VIII

I.

No m puesc sufrir d'una leu chanso faire,

Pus prec e man n'ai de Mon Ereubut;

Qu'après lo dan e l mal qu'ieu n'ai agut,

Coven qu'ab joy m'esbaudey e m'esclaire :

Quar segon l'afan

Qu'ai sufert tan gran,

Non agra razo

Qu'ieu cantes oguan ;

Mas quar fin'amors

Mi mostr'e m'ensenha

Que ls mais no m sovenha

E torn en mon chan,

Farai derenan

Un nou chantaret prezan.

II.

Ane per ren al de mon major maltraire

De tan bon cor non desirey salut,

Mas sol qu'a lieys cui Amors m'a rendut

Pogues ancar servir, petit о guaire;.

Quar tot l'autre dan

Non prezera un guan,

S'ieu moris o no,

Sol leis pogues tan

Servir que l'honors

Ar parra que m fenha

Per qu'ela m'estenha

Que non digu' enan ;

Mas al sieu coman

Sui e serai on qu'ieu m 'an.

III.

Las ! que faray, pois non li aus retraire,

Ans quan la vey, estau a ley de mut

E per autruy no vuelh sia saubut,

S'aqui mezeis sabi' estre emperaire.

A Dieu mi coman

Cum vau trebalhan ;

Qu'ab l'a sospeisso

N'aurai atretan,

Quar tan grans ricors

Non cug que m n'avenha;

Mas vas on qu'ieu teinha,

Fis e ses enguan

L'amarai quad'an,

De jorn en jorn melluyran.

IV.

Que'l cors e l cor e l saber e l vejayre

E l'ardimen e l sen e la vertut

Ai mes eh lieys e non ai retengut

Ni pauc ni pro per negun autr'afaire ;

Ni als non deman,

Ni vau deziran,

Mas que Dieus me do

Vezer l'or'e l'an

Que sa grans valors

Tan vas mi s destrenha

Qu'en mos bratz la seinha,

E qu'ieu, en baizan,

Tot al mieu talan

Remir son cors benestan.

V.

Ai! franca res, cortez' e de bon aire,

Merce n'ajatz que.veus m'aissi vencut;

Qu'aissi vos ren lo basto e l'escut,

Cum selh que plus non pot lansar ni traire :

Vostr' huelh belh truan

Que tot mon cor m'an

Emblat, non sai со,

No m van confortan.

Ja cas tels ni tors

No'us cugetz que's tenha, .

Pus gran forsa l venha,

Si secors non an

Sylh que dins estan :

Mas a mi vai trop tarzan.

VI.

Esta chansos vuelh que tot dreg repaire

En Arago, al rey cuy Dieus ajut;

Que per lui son tug bon fan mantengut, .

Plus que per rey que ane nasquet de maire :

Qu'aissi s vai trian

Sos pretz, e s'espan

Sobr'autres que so,

Cum sobre l verjan

Fai la blanca flors :

Per qu'ieu on que m venha

Ades erit sa senha,

E vau razonan

Son pretz, e non blan

Duc ni rey ni amiran.

VII.

Et ab ma chanso,

Enans qu'alhor an,

M'en vau lai de cors

On Jois e Pretz renha,

E vuelh que l'арrenha,

Cobletas viulan,

E puois en chantan

De qual guiz' hom la i deman.