Gui d'Ussel, bem pesa de vos

Gui d'Ussel, bem pesa de vos

car vos etz laissatz de chantar,

e car vos i volgra tornar,

per que sabetz d'aitals razos,

vuoill que m digatz, si deu far egalmen

dompna per drut, can lo quier francamen,

cum el per lieis tot cant taing ad amor

segon los dreitz que tenon l'amador.

[Dompna na Maria, tenssos

e tot chant cuiava laissar,

mas aoras non puosc estar

qu'ieu non chant als vostres somos;

e respon vos de la dompna breumen

que per son drut deu far comunalmen

cum el per lieis ses garda de ricor:

qu'en dos amics non deu aver maior].

Gui, tot so don es cobeitos

deu drutz ab merce demandar,

e dompna deu l'o autreiar,

mas ben deu esgardar sazos;

e l drutz deu far precs e comandamen

cum per amig' e per dompn' eissamen,

e dompna deu a son drut far honor

cum ad amic, mas non cum a seignor.

[Dompna, sai dizon de mest nos

que, pois que dompna vol amar,

egalmen deu son drut onrar,

pois egalmen son amoros;

e s'esdeven que Tarn plus finamen,

e l faich e'l dich en deu far aparen,

e si eir a fals cor ni trichador,

ab bei semblan deu cobrir sa follor.

Gui d'Uissel, ges d'aitals razos

non son li drut al comenssar,

anz ditz chascus, can vol preiar

mans jointas e de genolhos:

„dompna voillatz que us serva francamen

cum lo vostr' om", et ell' enaissi-l pren;

ieu lo jutge per dreich a trahitor,

si s rend pariers ei s det per servidor.

[Dompna, so es plaich vergoignos,

ad ops de dompn'a razonar

que cellui non teigna per par

ab cui a faich un cor de dos.

o vos diretz, e no us estara gen,

que l drutz la deu amar plus leialmen,

o vos diretz qu'il son par entre lor,

pois ren no Ih deu drutz mas quant per amor].