Jaufré Rudel
I
Quan lo rossinhols el folhos
Dona d'amor e n quier e n pren
E mou son chan jauzent joyos
E remira sa par soven
E l riu son clar e l prat son gen
Pel novel deport que renha,
Mi ven al cor grans joys jazer.
II
D'un' amistat suy enveyos,
Quar no sai joya plus valen,
C'or e dezir, que bona m fos
Si m fazia d'amor prezen,
Que l cors a gras, delgat e gen
E ses ren que y descovenha,
E s'amors bon' ab bon saber.
III
D'aquest' amor suy cossiros
Vellan e pueys sompnhan dormcn,
Quar lai ay joy meravelhos,
Per qu'ieu la jau jauzitz jauzen ;
Mas sa beutatz no m val nien,
Quar nulhs amicx no m'essenha
Cum ja n'aia bon sabcr.
IV
D'aquest' amor suy tan cochos
Que quant icu vau ves lieys corren
Vejaire m'es qu'a reũsos
M'en torn e qu'ela s n'an fugen;
E mos cavals i vai tan len
Greu er qu'oimais i atenha
S'Amors no la m fa remaner.
V
Amors, alegres part de vos
Per so quar vau mo mielhs qucren,
E suy en tant aventuros
Qu'enqueras n'ay mon cor jauzen,
La merce de mon bon guiren
Que m vol e m'apell' em denha
E m'a tornat en bon esper.
VI
E qui sai rema deleytos
E Dieu non siec en Belleen
No sai cum ja mais sia prps
Ni cum ja venh' a guerimen,
Qu'ieu sai e crei, mon escien,
Que selh qui Jhesus ensenha
Segur' escola pot tener.