IX

I.

Pessamen ai e cossir

D'una chanso faire

Qu'a lieys denhes abelhir

Guy suy fis amaire ;

E s'ieu pogues avenir

En bos digz re traire,

Far pogra saber

Que ieu plus fin joy esper,

Que nuls natz de mayre.

II.

Lo cors e l sen e l'albir

Ai mes e l vejaire

En lieys honrar e servir,

Quar es la belhaire

Qu'om pogues el mon chauzir,

Don no m puesc estraire

Ni mon cor mover ;

Qu' Amors me fai tan temer

Lieys qu'als non am guaire.

III.

La fina vera valors

Plus d'autra valensa,

E'l pretz, e l fresca colors

Me platz e m'agensa :

Que si me valgues Amors

Tan que m'entendensa

Mi dons abelhis,

Plus rie joy que Paradis

Agr' a ma parvensa.

IV.

Nulh' autra no m pot secors

Far ni dar guirensa ;

Et on plus en sen dolors

Plus n'ai sovinensa ;

Mas ges dire mas clamors

No l'aus per temensa ;

Tan li sui aclis

Qu'on plus vas me s'afortis,

Mai l'am ses falhensa.

V.

E fora li benestan

Si m des alegransa,

Tan qu' aleuges mon afan

Ab douss' acoindansa :

Qu'ieu li suy senes enguan,

E non ai membransa

D'als, mas quom fezes

Tot so qu'a mi dons plagues ;

Pero pauc m'enansa.

VI.

Qu'ades m'en vauc meluyran

On plus n'ai pezansa

Vas lieys, e suefri mon dan

Ab bon' esperansa ;

E doblera mon talan

Sil belha semblansa,

Gentils cors cortes,

Si t prezes de me merces

О qualsque pitansa.