V- Lanquan li jorn son lonc en may.

I

Lanquan li jorn son lonc en may

M'es belhs dous chans d'auzelhs de lonh,

E quan mi suy partitz de lay

Remembra m d'un' amor de lonh :

Vau de talan embroncx e clis

Si que chans ni flors d'albespis

No m platz plus que l'yverns gelatz.

II

Be tenc lo senhor, per veray

Per qu'ieu veirai l'anior de lonh ;

Mas per un ben que m'en eschay

N'ai dos mais, quar tant m'es de lonh.

Ai ! car me fos lai pelegris,

Si que mos fustz e mos tapis

Fos pels sieus belhs huelhs remiratz !

III

Be m parra joys quan li querray,

Per amor Dieu, l'alberc de lonh :

E, s'a lieys platz, alberguarai

Près de lieys, si be m suy de lonh :

Adoncs parra l parlamens fis

Quan drutz lonhdas er tan vezis

Qu'ab bels digz jauzira solatz.

IV

Iratz e gauzens m'en partray,

S'ieu ja la vey, l'amor de lonh :

Mas non sai quoras la veyrai,

Car trop son nostras terras lonh :

Assatz hi a pas e camis,

E per aisso no n suy devis...

Mas tot sia cum a Dieu platz !

V

Ja mais d'amor no m jauziray

Si no m jau d'est'amor de lonh,

Que gensor ni melhor no n sai

Ves nulha part, ni près ni lonh;

Tant es sos pretz verais e fis

Que lay el reng dels Sarrazis

Fos hieu per lieys chaitius clamatz !

VI

Dieus que fetz tot quant ve ni vai

E formet sest'amor de lonh,

Mi don poder, que cor ieu n'ai,

Qu'ieu veya sest'amor de lonh,

Verayamen, en tais aizis.

Si que la cambra e-1 jardis

Mi resembles tos temps palatz !

VII

Ver ditz qui m'apella lechay

Ni deziron d'amor de lonh.

Car nulhs autres joys tan no m play

Cum jauzimens d'amor de lonh.

Mas so qu'ieu vuelh m'es atahis.

Qu'enaissi m fadet mos pairis

Qu'ieu ames e no fos amatz.

VIII

Mas so q'ieu vuoill m'es atahis.

Totz sia mauditz lo pairis

Qe-m fadet q'ieu non fos amatz!