I- Canso

I

Amies, s'ie-us trobes avinen,

Humil e franc e de bona merce,

Be-us amera, quan era m'en sove

Que-us trob vas mi mal e fellon e tric;

E fauc chanssos per tal qu'ieu fass' auzir

Vostre bon pretz, don ieu non puosc sofrir

Que no-us fassa lauzar a tota gen,

On plus mi faitz mal et adiramen.

II

Jamais no-us tenrai per valen

Ni-us amarai de bon cor e de fe,

Tro que veirai si ja-m valria re,

Si-us mostrava cor fellon ni enic;

Non farai ja, car non vuoill poscatz dir

Qu'ieu anc vas vos agues cor de faillir,

Qu'auriatz pois qualque razonamen,

S'ieu fazia vas vos nuill faillimen.

III

Ieu sai ben qu'a mi estai gen,

Si be-is dizon tuich que moût descove

Que dompna prei a cavallier de se*

Ni que-l teigna totz temps tan lonc prezic;

Mas cel qu'o ditz non sap ges ben chausir.

Qu'ieu vuoill proar, enans que-me lais morii,

Qu'el preiar ai un gran revenimen

Quan prec cellui don ai greu pessamen.

IV

Assatz es fols qui m'en repren

De vos amar, pois tan gen mi cove,

E cel qu'o ditz no sap cum s'es de me;

Ni no-us vei ges aras si cum vos vie,

Quan me dissetz que non agues cossir,

Que calqu'ora poiri 'endevenir

Que n'auria enqueras jauzimen :

De sol lo dich n'ai ieu lo cor jauzen.

V

Tot'autr' amor teing a nien,

E sapchatz ben que mais jois no-m soste

Mas lo vostre, que m'alegr'e-m rêve,

On mais eu sent d'afan e de destric;

E-m cuig ades alegrar e jauzir

De vos, amies, qu'ieu non puosc convertir,

Ni joi non ai, ni socors non aten

Mas sol aitan quan n'aurai en dormen.

VI

Oimais non sai que-us mi presen,

Que cercat ai et ab mal et ab be

Vostre dur cor, don lo mieus no-is recre;

E no-us o man, qu ieu mezeissa-us o die,

Qu morai me*, si no-m voletz jauzir

De qualque joi; e si-m laissatz morir,

Faretz peccat, e serai n'en tormen,

E seretz ne blasmatz vilanamen