Think Lang

Lassie, think lang, think lang,

Ere his step comes ower the hill.

Luve gies wi a lauch an' a sang

An’ whiles for nocht bit ill.

Thir’s weary time tae rue

In the lea-lang nicht yer lane

The ghaist o a kiss on yer mou'

An’ sough o' win' in the rain

Lassie, think lang, think lang,

The trees is clappin’ their han’s

The burnie clatterin’ wi' sang

Rins ower the blossomy lan’s.

Luve gies wi' a lauch an’ a sang,

His fit fa’s licht on the dew.

Oh, lass, are you thinkin’ lang,

Star een an’ honey mou'?