Qui d'un poëte entend suivre la trace

Qui d'un poëte entend suivre la trace

En traduisant, et proprement rimer,

Ainsi qu'il faut la diction limer,

Et du françois garder la bonne grace,

Par un moyen luy conviendra qu'il face

Egale au vif la peinture estimer

L'art en tous pointz la Nature exprimer

Et d'un corps naistre un corps de mesme face :

Mais par sus tout met son honneur en gage,

Et de grand'peine emporte peu d'estime

Qui fait parler Petrarque autre langage,

Le translatant en vers rime pour rime :

Que pleust aux Dieux et Muses consentir

Qu'il en vinst un qui me peust dementir